تسريحات بسيطة .. لبنتك في العيد!

[مراقب]

السلام عليكم ورحمة الله وبركاته
اللهم صل على محمد وآل محمد وعجل فرجهم


كيف حالكم ...

سؤال..

اتمللوا بناتك من نفس التسريحة كل مرة ؟
ذيل الحصان ولا ظفيرة عادية ...
مجموعة من البكل الصغيرة تكون صف واحد ..
نفسك تغيري لهم ؟
تجددي...
تعطيهم لووك جديد للعيد!!!


جبت لكم اليوم
مجموعة من تسريحات الشعر البسيطة
اللي ممكن تستخدميها على بناتك الله يحفظهم ويخليهم لك

انا مرررررررة عجبوني وافكر اطبق على اختي الصغيرة هههه

وقلت اكيد راح تعجبكم
ولازم احطها لكم هنا

ان شاءا لله نشوف بنوتاتكم قمامير في العيد!!!

الموضوع متجدد ان شاء الله
كل مرة راح احط لكم مجموعة
ارجو ان تتابعوا معايا..

************

طبعا البنوتات يحبوا يلعبوا واذا تحمسوا دايما نلاقي شعورهم اتقربعت << انا كنت كدا هههههه
واللي دخل شعرها في فمها، واللي في عينها، واللي طاحت ولا نقلل من قيمة العلك واللبان اللي يطلع من الفم للشعر على طول ههههه يالله على الطفولة ... شي رهيب

هذه مجموعة راح تبعد شعورهم عن وجوههم
بس بشكل انيق وحلو
وهي راح تحبه برضو ... لانها راح تكون قمر!!

نصيحة للامهات..
قبل ما تبدأي حطي بنتك قدام سبيس تون عشان ما تتحرك!!






التسريحة الاولى..

تاج العقد..

أضغطي على الصورة لتكبيرها ..
الشكل النهائي



منظر جانبي ..



البداية..



أبدئي في المنتصف..
راح تطلع التسريحات اجمل لما تبدأي من المنتصف..



هذا رسم مبدئي عن تقسيمات الشعر، راح نبدأ نسوي العقد على اليمين واليسار
والمنطقة الوردية هي نقطة اللقاء..



قسمي الجزء الامامي، واتركي الجزء هذا راح نترك الجزء هذا نازل وما راح نرفعه كثير



اربطي عليه مطاط بخفة، ولا تشدي عليه



الان قسمي الشعر المربوط بيدك، الى قسمي، وادخلي الشعر من خلاله عشان نكون العقدة
يعني راح تدخلي الشغر من خلال التقسيم اللي عمليته



بعد ما عملنا العقدة الاولى، راح نكمل ونعمل اللي بعدها
بنفس الطريقة، راح تأخذي جزء من الشعر، وتربطيه بالمطاط بشكل خفيف وما تشدي عليه
وتكوني اضفتي الشعر اللي في العقدة الاولى عليها، عشان تتجمع مع بعض
وبعدين نفس الطريقة تعملي العقدة، تقسمي الشعر، وتمرريه من خلاله



وهذه شكل اول عقدتين مع بعض، شديهم على بعض كويس عشان يبان الشكل



وهذا شكله الان مع العقدتين



كملي بنفس الطريقة، واعملي الثالثة..



وهذه الرابعة اللي راح نضمها للجهة الثانية



الان ننتقل للجهة الثانية



زي ما اتفقنا، نربط جزء من الشعر ، بس لازم تكون منخفضة وخفيفة
لان لما تلفي الشعر راح تشدي عليه وراح يرتفع



الان بعد ما عملنا 4 عقد في الجهزتين
راح نجمعهم مع بعض، خذي الشعر اللي في اليمين واللي في اليسار
واجمعيهم في ذيل حصان



ونفس فكرة العقد اللي قبلها
ااقسميها وادخلي الشعر من خلال التقسيم
وكوني اخر عقدة...



والنتيجة تجنن!!!!








التسريحة الثانية...

شبكة الشعر..

الشكل النهائي



الشكل الجانبي




البداية..



ابدئي بالشعر وهو مبلل لان تقسيمه راح يكون اسهل، ومشطيه للخلف



والان على حسب سمك الشعر
اذا كانت بنتك شعرها خفيف زي البنت اللي في الصورة
ابدئي بالتقسيم على شكل مستطيل

اما اذا - ما شاء الله - شعرها كثيف، اعمليها مربعات



وامسك الجزء اللي قسمتيه، واربطيه بمطاط



كملي التقسيمات الى ان تخلصي كل الشعر اللي في الامام، في الصورة طلع معاها 6 اقسام ممكن تنتهي التسريحة هنا، وممكن نكمل للي بعده



هذا المنظر من فوق



الان راح نبدا نقسم كل ذل حصان الى النص
ونجمع كل اثنين متجاوريين زي الصور




النتيجة من بعد ما جمعنا الاجزاء المقسمة



عشان نعمل الجطوة اللي بعدها، لازم نبعد الجزء اللي عملناه عن الطريق
بس وديه على قدام وابعده عن مكان العمل <<< كأننا نبني عمارة ههههه




والان بناء على التقسيم الاولى، راح نقسم الشعر مرة ثانية
بنفس حجم المربعات - المستطيلات اللي في الصف الاول



الان الخطوة هذه يمكن شوي يبغالها صبر
راح تمسكي الجزء اللي قسمتيه جديد
وتقسمي الاجزاء السابقة الى النصفين

يعني كل ذيل حصان نتج من الخطوات السابقة ، راح نرجع نقسمه الى اثنين
ونمسك الجزئين المتجاورين ونجمعهم مع الجزء الاخير الجديد



زي الصورة هذه
بعد ما تقسمي الاجزاء اللي مربوطة، امسكي جزئين متجاورين
واجمعيهم مع الجزء الجديد



بدينا من المنتصف، لانه راح يسهل عليك تنزلي من جهة اليمين واليسار



ونحصل على التسريحة هذه


برب

[مراقب]

التسريحة الثالثة..

الشكل اللولبي!

الشكل النهائي



البداية..



راح نبدأ بالشعر وهو مبلل، بس مو كثير، يعني قولي الشعر ندي



الان راح نقسم الشعر في نص الراس، ونحصل على مربع
وهذا الجزء راح نرجع نقسمه الى جزئين
نمسك اليمين ونلفه ( عكس عقارب الساعة)
واليسار ( مع عقارب الساعة)

هذه الخطوة يمكن تدوخك شوية ، بس النتيجة تستحق!!



شديها وتأكدي انها مشدودة كويس
( ما ادري بس احس لما البنت تفك شعرها راح يعورها ههههه من كثر الشد )



نربطهم على بعض، ونحصل على النتيجة هذه



وهذه لحالها تسريحة حلوة ومرة كيوت
اضيفي عليها كلبسات ويا سلام مرة حلوة



بس اذا تبغي شكله يطلع احلى من كدا
في خطوة كمان ممكن نعملها




لفي الشعر بقطعة قماش!!!
اول شي بللي الشعر جدا جدا
وجزئيه ، وكل جزء لفيه على فوق واربطيه بقطعة القماش
هذه راح تكون لطيفة على فروة رأسها وما راح تزعجها
ممكن حتى تنام فيها من اليوم اللي قبله

( اذا كنتي ناوية تتعبي نفسك زي كدا، سويها في مناسبة تستحق، مثلا في العيد ولا في عزيمة راح تطلع لطيفة جدا !!)



ونحصل على النتيجة هذه
يختي عليها!




كيف تعملي الخطوة الاخيرة من التسريحة السابقة؟
تعالي اقول لك ...



انا اختي شافت التسريحة الثالثة وقالت تبغاني اعمله لها هههه
فقلت لازم اتدرب على لف الشعر زي كدا


البداية..

اول شي لازم تحصلي على قطع القماش، جيبي اي قماش ما تستخدميه او قديم، وقصيه على شرايط، طول الوحدة 15 سم عشان تكفي..
وبعدها نقدر نبدا



خلي شعرها مبلول مرررررة، وافضل لو تعمليها بعد ما تكون دوبها متروشة



نبدأ بتقسيم الشعر، وخلي القماش في يدك عند اصباع السبابة



لفي الشعر حول اصبعك اللي فيها قطعة القماش
ولفيها بالمقاس اللي تبغي الشعر يتلف عليه ، يعني لو تبغيها تلفلف مرة صغيرة
صغيرها... والعكس صحيح ،
الخطوة هذه مهمة جدا ، ولازم تتأكدي ان الاطراف ما هي مقربعة
عشان ما تطلع التسريحة فيها اجزاء غريبة وغير لطيفة





وابداي بلف الشعر الى ان تصلي الى فروة الرأس



الان كل اللي عليك فعله، هو انك تربطي قطعة القماس في عقدة حول الشعر
عشان يثبته مكانه




ونحصل على النتيجة هذه



وناخذ قسم جديد ونكرر نفس الفكرة



بنفس الطريقة



الان عشان نتأكد انو الشعر ما يكون مقسم بشكل غريب لما نفك قطع القماش
تأكدي انك تقسمي الشعر ، زي جدار الطوب، كل مربع تحت مربعين



والان حصلنا على النتيجة هذه
المشكلة هي انها تحتاج وقت طويل عشان تضبط وتلفلف الشعر
فممكن ان البنوتة تنام بيها وتقوم من بكرة تفكها
الحلو انه ما راح يعور لها راسها، لان كله قماش في قماش

اذا كنتي مستعجلة، ممكن تستشوري شعرها
بس لا تفكي القماش الا بعد ما يبرد الشعر



يختي عليها ، طعمة من جد!!

وهذه اول مجموعة
شجعوني عشان انزل المجموعة اللي بعدها

وعشان احمسكم
هذه اول تسريحة للمجموعة الثانية

[مراقب]

التسريحة الخامسة

ظفيرة فرنسية مع الشرايط

البداية..

لازم نتعلم كيف نعمل الظفيرة الفرنسية عشان نقدر نعمل التسريحة هذه
طبعا لازم تتدربي على عمل ظفيرة واحدة الاول
لما تتقنيها تقدري تعملي بعدها 2-3-4 ما في مشاكل

انا كنت دايما اعمل لاخواتي الظفيرة هذه
ماما علمتني طريقة، بس انا اعمل زي الصور هذه

امي تعمل الظفيرة بالعكس ، يعني بدل ما تصير الظفيرة بارزة كدا
تبان كأنها داخلة على جوه، السر هو في مسكة اليد
انا اظفر على برا، وهي على جوا

نتابع بالصور

بسم الله الرحمن الرحيم
لا تخافي من التسريحة هذه ، اذا عرفتي للظفيرة صارت التسريحة سهلة جدا!!



نختار نقطة البداية، زي ما اتفقنا اذا كان شعر بنتك كثيف ابدأي بمربع
اما اذا كان خفيف ، فخليها مستطيل احسن



طبعا زي كل الظفاير نبدأ بـ 3 اجزاء



البداية زي اي ظفيرة لما تبدأي تخلي الاجزاء الثلاثة تتداخل
بس عشان تبدأي الظفيرة، لا تعملي اكثر من تداخل واحد



نتوقف عند النقطة هذه ، وزي ما نلاحظ توقفنا في الطرف اليمين
راح نبدأ نزيد شعر الظفيرة من الجهة هذه



بالمشط خذي جزء من الشعر في الجهة اليمنى
واضيفيه على الجزء من الظفيرة اللي جالسين نشتغل فيها
لازم تتاكدي ان الجزئين الاخرين ممسوكين كويس
عشان ما تنفك عليك الشغلة كلها



بعد ما تدخلي الجزء الجديد، ارجعي وكأنك راح تظفري ظفيرة عادية
مع الاضافة الجديدة



واللي راح يخلي الظفيرة تبان على برا
انها بـ تثني الشعر لـ تحت
لو تدخلي الشعر من فوق ... راح تبان الظفيرة معكوسة

جربيها!!! وراح تفهمي قصدي...

بس الطريقة هذه احلى، عشان لما تضيفي الشريطة في الاخر



في هذه الصورة، نقدري نشوف الجزء المضاف
اللي هو بين الابهام والسبابة لليد اليسرى
كيف انها دخلت الى الظفيرة بشكل مرتب واضيف الى كمية الشعر بدون اي عناء



وزي ما قلنا، كل مرة نضيف الشعر، من اليمين واليسار
بشكل متساوي



لاحظي كيف اخذت جزء من اليسار الان واضافته الى الظفيرة



تذكري تدخلي الشعر من تحت والظفيرة تكون على تحت
عشان تبرز لفوق



وتكرري الى ان تنتهي من الشعر
لاحظي كيف بدت الظفيرة تظهر







هنا وقفتها في النص، وبطلت تضيف الشعر
وصارت الظفيرة الى النص

وبكذا عرفنا نعمل الظفيرة الفرنسية

الان بعد ما تكوني ادربتي عليها
تقدري تعملي اثنين



تقسمي الشعر من النص
وتعملي ظفيرة لكل جهة
تحصلي على ظفيرتين



جيبي ابرة تكون فتحتها كبيرة مررررررة
بحيث نقدر نخل الشريطة من خلالها
تعرفوا الابر البلاستك؟ اللي تنباع مع العاب الاطفال
اعتقد انها احسن من هذه الابرة الحقيقة

ما تدري بنتك ممكن تتحرك فجأة وانتي في يدك ابره حديد
لا قدر الله تدخل فيها وفي حاجة
ولو مو فيها فيك انتي

فلو تحصلي الابر البلاستك، راح تكون أأمن



نبدأ من فوق، كأننا راح نعمل شبكة

او زي حبل الجزم الرياضية - اكرمكم الله -



تأكدي انك عارفة النص، وان الجزئين متساويين



ونشتغل من فوق لتحت
يمين لـ يسار



خلصنا جهة وحدة في الاول



نعمل الجهة التانية اللي تتقاطع مع الاولى



نربط النهايات مع بعض في فيونكة حلوة



انتهينا!!



يختي عليها لزوز!!!!

ايش رايكم؟
انا عن نفسي احسها مرة سهلة يمكن لاني اعرف اعمل الظفيرة هذه
والفكرة تكمن في الشرايط وبس

جدا رائعة

[مراقب]

التسريحة السادسة

قرنين مهيصة

(هههههه ما ادري عجبني الاسم)



البداية



اقسمي الشعر الى جهة وحدة
وبلليه



اقسمي جزء بسيط من جهة



اربطيها بمطاط بس لا تشدي عليه كثير، وخليه نازل شوية



راح نعمل عقدة نفس التسريحة الاولى



وهذه النتيجة



هذه بحد ذاتها ممكن تكون تسريحة
لكن نحن راح نكمل عشان نكون التسريحة كاملة



قسمي الشعر بشكل مايل
زي الصورة




نربط القرنين



ممكن تخليها زي الصورة الاولى
او مثل هذه، بحيث انك ما تسحبي الشعر كله عبر البكلة او المطاط
وتعطي الطابع الـ حلو هذا

جدا طفولي



تنفع لما يكونوا طالعين للملاهي!!

[مراقب]

عدنا




بالتسريحة السابعة

تاج الظفاير

صورة نهائية



البداية:



نبدأ بذيل حصان صغيرة على قمة الرأس، ونظفره زي الصورة




الان اسحبي الظفيرة للجنب ، و اضيفي بعض الشعر للظفيرة الاولى
بحيث تكون نهاية الاولى مع بداية الثانية




وتظفري الجزء الجديد، وتقفليه بمطاط زي الاول
بعدين تضيفي شعر زيادة من تحتو الين ما تحصلي على النتيجة هذه
ظفيرة على الجهة اليسرى من الرأس



وكرري نفس الخطوات للجهة الثانية



الان ضميهم تحت الشعر كلو واربطيهم بمطاط
او ممكن تخليهم على الطرفين
بس لو ربطيهك وقتها يبانو زي التاج على الراس



انتهينا!!
يا نااااااااااث لزوزة من جد..







التسريحة الثامنة

ظفيرة عظم السمك

الصورة النهاية



البداية:

هذه الظفيرة اسهل من الظفيرة الفرنسية، لكن تاخذ وقت اكثر منها



التقسيم في البداية الى جزئين فقط



الان خذي جزي من الشعر اللي من جهة اليمين، اسحبيه من فوق المجموعة اللي قسمتيها
واضيفيها الى المجموعة اليسرى

يعني :
شعر من اليمين
*
*
*
من فوق المجموعة المقسومة من جهة اليمين
*
*
*
تضاف الى المجموعة في جهة اليسار



شوفي كيف اخذت شعر من جهة اليمين، ومررته من فوق المجموعة
والان ساحبة الشعر في النص عشان تورينا
وراح تضيفه الى مجموعة الشعر اللي في اليسار



نسوي نفس الفكرة في جهة اليسار

ناخذ قليل من الشعر من جهة اليسار

نمررها فوق المجموعة اللي في اليسار
ونجمعها مع الشعر اللي في جهة اليمين

وهكذا



نحصل على هذا الشكل
بعد ما اضفنا شعر من الجهيتن



وكملي الى اخر شي
ممكن توقفي هنا، وتلفي الاطراف النهائية
وتحصلي على تسريحة حلوة



او تكملي وتظفري الشعر كله


ايش راح نسوي؟
راح نرجع نأخذ من الطرف الخارجي ونضيفه الى الجهة الثانية
من جهة اليمين الى جهة اليسار
ومن اليسار الى اليمين
وتستمري



الى ان تخلصي الشعر كله
وتربطيه بمطاط





وفي النهاية ممكن ترفعي الجزء النهائي من الظفيرة
وتحطي بنس تثبتيها في مكانها تحت الشعر

اضيفي وردة
ويا سلام



برب اجيب التسريحات التانية

[مراقب]

عدنا




التسريحة التاسعة

رفع الشعر من الامام

الشكل النهائي



هذه التسريحة راح تطلع احلى على اللي شعروهم خفيفة
لانها تعطي كثافة اكثر

البداية:



بللي الشعر قليلا، واربطي ذيل حصان في قمة الرأس



اسحبي الشعر من تحت لفوق ، زي الصورة



اعمليها على الجهتين ، يعني تصير عندك 3



شكله الان شوي ملخبط
بس انتي لفي الشعر

وراح تحصلي على هذا






تدنن!!





التسريحة العاشرة

قرنين من العقد

الشكل النهائي



البداية:



هنا هي عملت الجهة اليمين
وراح تعمل جهة اليسار

فاكرين العقد اللي في التسريحة الاولى؟
نفسها راح تستخدم هنا كمان

بس لازم تقسمي الشعر بشكل متماثل في الجهتين
عشان تطلع في النهاية التسريحة طعمة

طبعا انتي تقسمي الشعر بالنص وتشتغلي على الجهتين



نعمل اول عقدة ، زي ما شرحنا في اول تسريحة



وانتي ماشية كل شوية تزيدي الشعر
وتعملي عقدة



دحين اخر عقدة في جزء متبقي من الشعر ما حطيناه
راح نعمل حركة


نجمع الشعر اللي مربوط والشعر المتبقي و نربطه مع بعض بمطاط تاني



شكلو مو حلو كدا بمطاطين، راح نقص المطاط الاول ونخلي التاني اللي ماسك الشعر كلو





شوفوا كيف تبان العقدة داخلة على جوا!!



الان راح نكمل
اقسمي الشعر ، خلي 3\4 في يدك و ربع اتركيه



اربطي الشعر بمطاط
واعملي عقدة




بعدين اضيفي الشعر اللي تركتيه نازل
واربطي بمطاط مرة تانية
وقصي الاول



يعني نفس الحركة اللي عملناها قبل شوية بالضبط



استمري على حسب طول الشعر



والنتيجة طعمة مرة !!!

برب

[مراقب]

عدنا




التسريحة الحادية عشر

صف من العقد

الصورة النهائية



البداية:



عارضة الازياء وحدة جديدة هههه
هي كاتبة انها بنت اختها، برضو لزوزة

المهم..
خذي جزء من الشعر، تقريبا بعرض الجبهة



واقسمي جزء بسيط منها بالمشط




وهذا راح نكون بيها اول صف من العقد




اقسميها الى جزئين



اربطيها في عقدة.. لكن لا تربطيها



كملي ودخلي خصلة الشعر مرتين ثانية
يعني كأنك تلفيها 3 مرات
وبعدين شديها



نحصل على هذه!!



سوي عدد الصفوف اللي تعجبك!





يختي عليها طعمة!!
مرة حلو!!

[مراقب]

التسريحة الثانية عشر

كعكة مهيصة

الشكل النهائي




البداية:



اول شي اعملي مجموعة من الظفاير في الامام

مثلا 3 جهة اليمين
و 2 جهة اليسار
على كيفك لان التسريحة هذه من المفترض انها تكون زحمة وهيصة



اجمعي الظفاير مع بقية الشعر في مطاط واحد
وشيلي المطاطات الصغيرة اللي كانت ماسكة الظفاير
راح يصير عندك مطاط واحد للكل




امسك الشعر ولفيه حوالين اصباعين من اصابعك
مكونة الشكل اللي في الصورة
وبعدين اربطي بمطاط الشعر بهذا الشكل



حركي الشعر وتأكدي ان شكله مرتب في نفس الوقت كيوووت



نحصل على النتيجة هذه !!



يختي عليها مبسوطة البنت على التسريحة
انا كلو كوم والبنت ماسكة بخاخ الموية وفي فمها هههههه كوم تاني




التسريحة الثالثة عشر

ظفيرة فرنسية اعلى الرأس

الصورة النهائية



هذه مرة عجبتني بصراحة!

البداية:



لازم تتدربي كويس عشان تقدري تعملي هذه التسريحة
لازم تعرفي تعملي الظفيرة الفرنسية كويس مررررررررة

هي بدأت في الطرف اليسار وتحركت حوالين البنت الين كملت الدائرة
واستخدمت البنس عشان تمسك الشعر المتطاير

لازم تحاولي عدد من المحاولات في البداية الين تضبط معاك
هي نفسها تقول انها كانت تعملها بشكل بيضاوي الين قدرت تضبط الدائرة زي كدا



نضيف الشريطة زي الفكرة الاولى
ونحصل على هذا





التسريحة الرابعة عشر




راح تبدأي بالاثنين اللي في نص الراس
اللي ورى بعض
وتقسميهم الى جزئين
وتبدأي تروحي على الجنبين

وراح تبني الشكل وانتي ماشية

سهلة مرة هذه!!!

لي عودة ان شاء الله

[مراقب]

التسريحة الخامسة عشر

مجموعة من العقد

الصورة النهائية



البداية:



نعمل صف في منتصف الرأس
من وجهة نظر الام اللي جالسة تعمل التسريحات
ان اذا عملتي عدد (فردي) احلى بكثير اذا عملتي عدد (زوجي)



لما تعملي العقد اللي على الاطراف
حاولي انك تخلي الجزء العلوي اقل من السفلي
عشان لما تعملي العقدة راح تطلع على فوق
بدل ما تصير العقدة لتحت
وراح يكون شكلها ارتب بكثير





وبكذا نكون خلصنا الجهتين



نربط الاجزاء كلها مع بعضها



والشعر اللي في ذيل الحصان الاخير نقلبه برضو الى عقدة





انتهينا

[مراقب]

التسريحة السادسة عشر

كعكة الشرايط

صورة نهائية :



هذه تنفع للشعرها كثيف اكثر من اللي شعرها خفيف

البداية:



جيبي مجموعة من البنس، واربطي عليها شريطة زي الصورة



اربطي الشعر في ذيل حصان
واسحبي خصلة من الشعر
ابدأي في لفها
واستمري الين ما تتجمع المجموعة على بعضها



لما تتجمع زي كدا، ثبتيها بالبنسة
وكملي على بقية خصل الشعر

وراح تحصلي على النتيجة اعلاه!




التسريحة السابعة عشر

رأس من العقد

الصورة النهائية: